الرئيسية » أخبار مهمة » من بنت شيعية الى السيد حسن نصرالله

من بنت شيعية الى السيد حسن نصرالله

 صرخة موجهة الى السيد حسن نصرالله تنقل بعضا من معاناة اللبنانيين وعلى الاخص الجنوبيين.
 إنت بتعرف قديش بنحبك صح؟ قديش نحنا من قلب قلبنا بنقلك لبيك. بس:

يا سيد حسن إنت راضي هيك؟
راضي شعب المقاومة هيك يتجوع؟ راضي اشرف الناس هيك يصير فيهم؟

يا سيد نحنا نؤمن بخياراتك وقراراتك، بس يا سيد إنت موافق على تجويعنا؟
يا سيد، نواب الطايفة مبارح حضروا الجلسة، جلسة نهش الشعب، كان فيهم يقاطعوا يا سيد متل ما قاطعوا غير جلسات.

يا سيد يمكن نحن ما بنفهم سياسة ونحنا موكلينك أمرنا، بس يا سيد كلنا بنفهم شو يعني جوع ومرض وقلة.

يا سيد، بنعرف إنو الحزب مأمن للمنخرطين فيه تسهيلات، بس يا سيد أشرف الناس مش كلهم منخرطين بالحزب.

يا سيد، أنا بنت لبنانية بحبك وبصدقك، قول إنك مش راضي عن *الضريبة 11٪‏*.

يا سيد ربطة الخبز زاد سعرها، يعني عوائل الشهدا اذا كانوا ياكلوا ربطين خبز لازم يقتصدوا. بترضاها يا سيدي، بترضى إنو عيلة الشهيد، او جار الشهيد او رفيق الشهيد او مجتمع الشهيد يقتصد بلقمة عيشوا ليعيش بعد ما فقد الغالي كرمال كرامتو؟

يا سيد، أشرف الناس يلي شبعوا الكوكب كرامة، رح يموتوا بس هالمرة مش شهدا، رح يموتوا جوع، أو قهر أو عباب المستشفى أو…
يا سيد، أهل البيت بكربلا انحرموا المي، وأشرف الناس عم ينحرموا الأكل والشرب والتدفئة والتعليم.

يا سيد، بنعرف يا حبيبي إنك شو بدك تحمل لتحمل، وبنعرف إنك لحالك وبنعرف إنك يمكن ما بتعرف قديش في وسخين عم يستغلوا ايمان الناس بمصداقيتك لينصبوا جوات المجلس وبراتو.

يا سيد، لو الله سبحانه وتعالى مش عارف إنو أهل البيت(ع) كانوا أهل لتحمل المصايب والعذاب والسبي ما اختارهم ليكونوا الصراط المستقيم.

يا سيد، لو الله جل أسمه مش عارف إنو السيدة العذراء(ع) رح تتحمل وتصبر ع حكي العالم ما كان مرقها ب يلي مرقت فيه.

يا سيد، إنت متلن يابن فاطمة.
يا سيد، الزيادة مش 1% لأ الزيادة صارت *11%*.
يا سيد، ليش الرئيس بري ما كان بالجلسة مبارح؟ ليش وكل المهمة لنايبو فريد مكاري؟ يا سيد بنعرف إنو خجلان لأنو بيعرف الفقر الغرقان في شعب المقاومة.

يا سيد، الشعب يلي بيفهم شو يعني أرض وعرض وكرامة، بيفهم كل شي منوش غبي ومش عن عبس عم يقدم شبابوا لنعيش بفخر.

يا سيد، ب عز علينا ينقال نواب الوفاء للمقاومة سكتوا عن قرار ضريبة رح تجوع شعب المقاومة.
يا سيد، هيدا هوي الاصلاح والتغيير يلي انوعدنا في؟
يا سيد، أشرف الناس مش راضيين عن قرارات النواب ولا عن سكوتهم ولا عن تقاعصهم، قلن يا سيد يدافعوا عن رغيف الخبز ليضل في حيل للشباب ويضل مين يحمينا، قلن يدافعوا عن التعليم ت يضل شعبك واعي ومثقف ومتعلم، قلن يدافعوا عن المازوت ليتدفى ابن الشهيد او لتدفى إم المجاهد بالسهرة وتدعي لإبنها بالنصر هيي وناطرتو يرجع عن جبهة العز. قلن انك مش راضي هني بيسمعولك. قلن لازم شعبنا يضل حدنا لنكمل. قلن يا سيد إنو الشعب مل وصاروا نواب المقاومة متل غيرهم بنظر شعبهم.

يا سيد، اذا وصلتك هيدي الرسالة لازم تعرف إني بنت لبنانية 100%، من لبنان، البلد يلي راح هادي وغيروا من الشباب كرمال ترابو، منيش من شيعة السفارة ومنيش مندسة وبحبك يا سيد من بعد الله، بس الله ما بيرضى هيك.