الرئيسية » رصد » أنا … مع الشهيد والمجاهد وضد الحاج العكروت …

أنا … مع الشهيد والمجاهد وضد الحاج العكروت …

بالعامية وواضح
على الصعيد العكسري أؤمن بالجهاد لو على المريخ مع حفظ حقوق  المجاهد والشهيد وعدم تسليط الحاج العكروتعلاي وعأهلو …
على الصعيد العقائدي عن قريب بصير ملحد …
أما على الصعيد السياسي فهون الرسالة لنوابنا الكرام …
أنا إبن هالمنطقة المحرومة ويللي يوم عن يوم عم تزيد كمية الحرام فيها بسبب شبه عدميّة الحلال …
أنا من الشباب يللي عاشوا أيام سودا أكتر من الليل بسبب الحرمان وقلة وفا النائب يللي انتخبتوا وهتفت بإسمو وسلمتوا كلمتي بالدولة ليناشد بوجعي …
أنا من الشباب يللي ما شافت مشروع إنمائي فيك يا بقاع إلا على إيد الحريري ويا ريت اتحركت الكرامة والنخوة بنوابنا ليعملوا شي أحلى من يللي عملوا …
أنا من الشباب يللي ما شافت بهيدا الزّمن غير موت البطل والمظلوم إما بالجهاد ع إيد الإسرائيلي أو التكفيري أو القهر يللي نابع من قلة وفا نوابنا أو من قطاعين الطرق بعبارة أوضح  مرتزقة المافيا السياسية …
أنا من الشباب يللي بتفدي نهج المقاومة بدمها وما بتنسى التاريخ بس ما بترضى تنضام وينهدر حقها ع إيد شلّة حرامية رخاص
أنا من الشباب يللي بيوم من الأيام ممكن كانت تصير خارجة عن القانون ومطلوبة للدولة بس كرمال تأمين لقمة العيش …
 رزق الله لنصير بشر وعنا إنسانية

ربيع خضر طليس