الرئيسية » سوشيال ميديا » رسالة حركية من أيمن عاصي الى السيد حسن

رسالة حركية من أيمن عاصي الى السيد حسن

كتب الناشط أيمن عاصي على صفحته فيسبوك 

 سماحة سيد حسن، 

 

النأي بالنفس يلي التزمتوا فيه بيشمل موضوع إسرائيل كمان؟ و استطرادا اذا استنكرتوا كلام باسيل عن حق اسرائيل بالعيش بطمأنينة و سلام بيعتبر خرق للنأي بالنفس؟ و إذا عندكن ظروف سياسية و انتخابية بتمنعكم إنو تستنكروا كلام حليفكم فكمان عندكن ظروف بتجبر جماعتكم عوسائل التواصل الاجتماعي انو يدافعو عنو بهالشراسة هيدي و يهاجمونا كرمال عم نهاجموا و نستنكر حكياتو؟

سيد حسن،
انسى قصة المياومين و إنكم وقفتوا موقف المتفرج على كل هالذل و هالهوان يلي عم بمارسو عليهم حليفكن، إنسى قصة الناجحين بمجلس الخدمة الوطنية يلي رفض انو يوظفهن و ما كلفتوا خاطركن انو تمارسوا عليه ضغط و هوي اصلا ما بكلفكن اكتر من كلمتين من سماحتك، إنسى قصص كتير يا سيد بس انو قصة اسرائيل بعدها مش فايتي براسنا و مش عم نستوعب ابدا كيف قدرتوا تتجاوزوها و تسكتوا عنها، إذا انتو بدكن تسكتوا عن هيك قصة بشو بدنا تعتب عالغريب بعد؟ بشو بدنا تعتب على آل سعود و آل خليفة و كل هالملوك و الرؤسا العرب يا سيد؟

سماحة السيد،
أقسم بالله اني بحبك، وحيات دم بلال فحص و ابنك هادي اني بحبك، و كرمالي بحبك رح اسمح لحالي اني منك طلب صغير و بتمنى انو اذا وصلوك حكياتي تتقبل هالطلب مني، سيد انا ما بشك لحظة وحدة بعداوتك لإسرائيل و انت يلي قدمت اغلى ما عندك شهيد بسبيل هالقضية يلي هيي قضيتنا كلنا، بس يمكن ظروفك و ظروف حزبك بتخليكن انو تسكتوا عن هيك فضيحة وطنية على لسان حليفكن ما في ولا لبناني سبقوا عليها حتى فؤاد السنيورة يلي بتتهموه انو تآمر عليكم بحرب تموز، كرمال هيك سيد و بما إني ابن موسى الصدر يلي كان مستحيل يقبل لحظة انو يسكت عن هيك عار و عن هيك ذل و عن هيك وقحنة و عن هيك خيانة وطنية بتمنى منك انو تعمم على قيادة حزبك انو معش يرفعوا صور موسى الصدر بإحتفالاتهم و بمسيراتهم و خليهم يرفعوا بدالها صور جبران باسيل كرمال اول شي مش لايقة بحق الإمام و تاني شي بتكونوا متصالحين مع وضعكن الجديد اكتر.
#مع_كل_محبتي