الرئيسية » رصد » نحن أيضا أوفياء يا سيد حسن … ولهذا أحب وليد جنبلاط !

نحن أيضا أوفياء يا سيد حسن … ولهذا أحب وليد جنبلاط !

 

كتب الناشط أيمن عاصي : انا كإبن حركة امل، ليش ما بدي حب وليد جنبلاط ؟ 

 انا لمن شوف صاحبي الدرزي الاشتراكي منزّل على صفحتو صورة للرئيس بري وفي تحتها خمسمية لايك وميتين قلب من اخواننا الاشتراكية ليش ما بديش حب وليد جنبلاط ؟

انا لمن يكون عندي صحاب اشتراكية دروز وشوف انو حجم عدائهن لاسرائيل ما بقلش عن حجم عدائنا الها ليش ما بديش حِب وليد جنبلاط ؟

انا لمّا بدي إتطلع عالتاريخ وشوف انو الوحيدين يلي كانو لجانب حركة امل بانتفاضة ستة شباط و اسقاط 17 ايار ونقل لبنان من العصر الاسرائيلي للعصر العربي المقاوم هني شباب الحزب التقدمي الاشتراكي ليش ما بديش حب وليد جنبلاط ؟

انا لمن شوف انو بعز الانقسام المذهبي و السياسي بعد مقتل الشهيد رفيق الحريري وتحديدا بعد مقتل الزيادين وقف وليد جنبلاط واعلن موقف للتاريخ ومنع الفتنة يلي كانت رح تشعل لبنان ورح تاكل الاخضر واليابس بهالبلد ليش ما بديش حب وليد جنبلاط ؟

انا لمن بدي ارجع للمرحلة يلي استلموا فيها 14 اذار البلد وعملوا المستحيل هني والاميركان والفرنساوية ليجيبوا شخص غير نبيه بري لرئاسة البرلمان وبليلة فيهاش ضو قمر بيوقف وليد جنبلاط وقفة مارد و بيتحداهن كلهن و بقول مُرشّحي الوحيد لرئاسة المجلس النيابي هوي الاستاذ نبيه بري ليش ما بديش حب وليد جنبلاط ؟

مش عم رد عالسيد حسن واساسا مين انا لرد عقامة عملاقة متل قامة السيد حسن بس !

انا كإبن حركة امل عندي وفى لحلفائي متل ما السيد حسن عندو وفى لحلفاؤو.

انا كإبن حركة امل ما بنساش يلي وقف معي متل ما السيد حسن والاخوة بالحزب ما بينسوش يلي وقفوا معاهن

انا كإبن حركة امل كنت بتمنى من كل قلبي انو وليد جنبلاط ما يهاجمش ايران بس ابدا ما بوتّرش البلد كرمال ايران وغير ايران.

انا كإبن حركة امل مقتنع مليون بالمية انو الوزرا السنية المستقلين بحقلهن يكون الهن وزير بس ما بهاجم فلان وعلتان كرمال رافضين توزيرهن وبستثني ميشال عون وجبران باسيل يلي كانو اول ناس وِقفوا ضد توزيرهن قبل وليد جنبلاط وغير وليد جنبلاط.

انا كإبن حركة امل بقولها عراس السطح انو لاخوة بالحزب ما خصهنش بكل المنظومة الفساد يلي وَصّلت البلد لهون بس تعطيل البلد سنتين ونص كرمال ميشال عون وقبلها سنة وشهر كرمال يتوزّر جبران باسيل هيّي من الاسباب الرئيسية يلي وصّلت البلد لهون.

انا كإبن حركة امل السيد حسن قائدي وحليفي ومقاومتو ضد اسرائيل والقوة يلي وُصلتلها هالمقاومة بفضل الله وبفضلو بترفعلي راسي وهيي تاج على راسي بس مش معناتها اذا وليد جنبلاط انتقد ايران أوقف مع السيد حسن ضدو، ميشال عون زار اميركا وزار فرنسا وزار قطر وزار السعودية وما دعسش دعسة على إيران فـ ليش بدي ضل مستثنيه ؟

ليش النقد بدو يكون انتقائي ؟

ليش الهجوم بدو يكون انتقائي ؟

ما حداش بالكون بيطلعوا يحكي كلمة عوطنية السيد حسن وهوي يلي قدم ابنو شهيد كرمال هالوطن بس قصّة انو كل ما حدا اخد موقق معيّن من ايران بدنا نعاديه وبدنا نوجهلو رسايل وبدنا نتهموا انو عم يخدم اميركا واسرائيل وبدنا نوتّر البلد كرمال موقفو فهيدي مشكلة لازم ينلاقالها حل اليوم قبل بكرا، هيدا البلد بلدنا كلنا وهيدا الوطن وطنّا كلنا والشيعة نعم ومليون نعم ماخدين اقل من حصُّتهم بكتير بنظام هالبلد بس وليد جنبلاط ماخد اقل مننا بكتير، وليد جنبلاط مش هوي المسؤول عن هالشي ابدا .

مش وليد جنبلاط يلي جايي ياكل الاخضر واليابس بهالبلد .

مش وليد جنبلاط يلي كل حكيو حكي مذهبي وحكي عنصري وحكي طائفي.

مش وليد جنبلاط يلي عم بحاول يرجّع البلد للمارونية السياسية وللهيمة عكل الطوايف بهالبلد.

مش وليد جنبلاط يلي موقّف كل التعيينات كرمال يلي نجحوا من الشيعة اكتر من يلي نجحوا من غير دين وغير مذهب وغير طايفة.

مش وليد جنبلاط يلي وقّف تثبيت الاساتذة الناجحين بالوظيفة.

مش وليد جنبلاط يلي وقف تثبيت مأموري الاحراش وشباب الدفاع المدني.

مش وليد جنبلاط يلي بعت جماعتو يلاشقو المياومين المشحّرين المعترين بالعُصي وبالحجارة كرمالهن من غير طايفتو.

انت يا سيد حسن بتعرف كتير منيح مين يلي عمل كل هولي الاشيا.

انت يا سيد حسن اكتر واحد عندو جرأة انو يخبط ايدو عالطاولة و يقول لميشال عون ولصهرو لميشال عون بزيادة هلق حَدكن هون وخلُصنا.

انت يا سيذ حسن عندك اكبر جرأة انو تقلهن وقفتو مع ولاد بلدكن بحرب تموز وهيدا اقل واجب مش جميلة.

انت يا سيد حسن اكتر واحد فيك تقلهن انا عملت بأصلي و بأخلاقي و قلتلكن إنو الكن دين برقبتي ليوم القيامة بس مش معناتها انو تلعنو إختو لهلبلد وللتعايش بهالبلد.

بعد اذنك يا سيد انت سيدنا و حبيبنا و تاج راسنا و انا بنتمي الك متل ما خيي ابن الحزب بينتمي الك بس مية بالمية اني صير حبّك اكتر وقدرك اكتر لمن تصير تعامل الكل متل بعضن، مش ناس بسمنة وناس بزيت، مش ناس عندن كارت بلونش يعملوا يلي بدن اياه و ناس كرمال موقف بيختلف مع موققنا نقيّم الدنيا وما نقَعّدها،،،


على امل نفيق عبلد متل العالم و الناس، صباح الخير لأهل الخير..